Ný stjórn var kosin á aðalfundi hópsins þann 27. október sl. og er nýr formaður hópsins Edda Blumenstein frá beOmni en hún veitir einnig Rannsóknarsetri verslunarinnar forstöðu. Helstu viðfangsefni hópsins á árinu voru:
Einnig hafa málefni Tækniþróunarsjóðs verið rædd, og þá einkum að áherslur sjóðsins virðast verða til þess að verkefni hjá fyrirtækjum í verslunar- og þjónustugeiranum virðast ekki hljóta nægs stuðnings sjóðsins. SVÞ sendi inn umsögn um frumvarp að lögum Tækniþróunarsjóð og fulltrúi samtakanna sótti í kjölfarið fund með atvinnuveganefnd um málið. Samtökin mun halda áfram að fylgja málinu eftir.
Mikið hefur gerst á síðastliðnu ári í því verkefni að koma á öflugum stuðningi við stafræna umbreytingu í íslensku atvinnulífi og á vinnumarkaði. Eins og fram kom í ársskýrslu síðasta árs fóru formaður, framkvæmdastjóri og nú verkefnastjóri stafrænnar þróunar hjá samtökunum á fund ráðherra ferðamála, iðnaðar og nýsköpunar í febrúar sl. Margt hefur gerst síðan og má sjá yfirlit yfir helstu áfanga verkefnisins í þessu stutta myndbandi:
Samstarfi við Háskólann í Reykjavík var komið á á vordögum og í kjölfarið sóttu fulltrúar SVÞ og HR annan fund með iðnaðar- og nýsköpunarráðherra. Þar kom fram hvatning um að sækja um í Markáætlun fyrir verkefnið.
Í sumar var svo komið á samstarfi við VR, enda mikill samhljómur milli SVÞ og VR varðandi þau verkefni sem við stöndum frammi fyrir í stafrænni umbreytingu. Nauðsynlegt er jú ekki eingöngu að stjórnendur fyrirtækjanna okkar hafi skilning, þekkingu og þá hæfni sem þarf til stafrænnar umbreytingar, heldur er brýnt að starfsfólk þeirra og fólk á vinnumarkaði almennt hafi það einnig. Óhætt er að segja að samstarfið hafi gengið snurðulaust fyrir sig og fögnum við því mjög.
Í kjölfar tillögu sem fram kom á fundi með ráðherra sóttu SVÞ, VR og HR sameiginlega um í Markáætlun fyrir Stafrænt hæfnisetur. Verkefnið hlaut ekki styrk enda má færa rök fyrir því að það hafi ekki passað inn í ramma áætlunarinnar eins og mátti sjá af þeim verkefnum sem hlutu styrk, en áhersla þeirra er fyrst og fremst á rannsóknir og mikil áhersla á vísindaleg verkefni. Vinnan við umsóknina var þó mjög dýrmætur undirbúningur og má ætla að hugmyndin hefði ekki þróast jafn mikið á skömmum tíma og hún ella hefði gert.
Í lok október sendu svo SVÞ og VR frá sér sameiginlega hvatningu og tillögur til stjórnvalda í stafrænu málum. Voru tillögurnar í fimm liðum og snéru að því að koma á samstarfsvettvangi stjórnvalda, sveitarfélaga, atvinnulífs, vinnumarkaðar og háskólasamfélags um stafræna þróun, sett verði á fót Stafrænt hæfnisetur til eflingar stafrænni hæfni í íslensku atvinnulífi, mótuð verði heildstæð stefna í stafrænum málum fyrir íslenskt samfélag og atvinnulíf og farið í markvissar aðgerðir til að stuðla að stafrænni þróun. Einnig var lagt til að skattfrádráttur rannsóknar- og þróunarverkefni verði útvíkkaður til að ná til stafrænna umbreytingaverkefna og að áhersla verði lögð á það í menntastefnu og aðgerðum að efla stafræna færni á öllum skólastigum.
Tillögunum fylgdi ítarleg greinargerð um stöðu íslensks atvinnulífs í stafrænni umbreytingu og fjölmargt annað sem snýr að þessum málum.
Smelltu á myndina til að lesa hvatninguna og tillögurnar í heild sinni
Í október og nóvember má svo segja að hjólin hafi farið að snúast ansi hratt. Verkefnastjóri stafrænnar þróunar kynnti hvatninguna og tillögurnar víða. Á sama tíma var í vinnslu klasastefna stjórnvalda og ljóst varð að klasahugmyndafræðin væri tilvalinn grunnur að því nauðsynlega samstarfi sem koma þarf á í þessum málum. Eftir annan fund með iðnaðar- og nýsköpunarráðherra og hennar fólki og fund með forsætisráðherra ásamt sérfræðingum úr ráðuneytinu, auk samskipta við fleiri aðila frá stjórnvöldum, lögðu ráðherrarnir fram minnisblað á ríkisstjórnarfundi rétt fyrir jól um þátttöku stjórnvalda í stofnun stafræns ofurklasa*, ásamt SVÞ, VR og HR, og í framhaldinu fyrirtækjum og fleiri aðilum. Menntamálaráðherra bættist svo við það minnisblað sem samþykkt var í ríkisstjórninni.
*munurinn á „venjulegum” klasa og ofurklasa er í stystu máli sá að stjórnvöld koma með beinum hætti að ofurklasa.
Klasastefna fyrir Ísland var svo kynnt um miðjan mars og eru nú í gangi viðræður við stjórnvöld um með hvaða hætti þau munu koma að klasasamstarfinu. Það mun vonandi skýrast núna á allra næstu vikum og verður þá hægt að hefjast handa við frekari undirbúning þessa mikilvæga verkefnis, og stofnun klasans. Næstu skref verða þá væntanlega að kynna verkefnið fyrir fyrirtækjum og ýmsum öðrum hagaðilum og hefja undirbúning áður en til formlegrar stofnunar og starfsemi getur komið.
Þegar öll nauðsynleg atriði liggja ljós fyrir mun verkefnið verða kynnt ítarlega fyrir aðildarfyrirtækjum SVÞ og félagsfólki og er það von stjórnar og starfsfólks samtakanna að sem allra flestir taki þátt í þessu mikilvæga samstarfi.
Það er ekki venjan að fjalla um þann árlega viðburð sem jafnan er haldinn á aðalfundardegi, fyrr en í ársskýrslu að ári. Hinsvegar eru efnistök ráðstefnu SVÞ 2021 mjög í samræmi við þá spennandi vinnu sem í gangi hefur verið í stafrænu málunum og því þótt við hæfi að leyfa umfjöllun um hana að fljóta með hér. Formið er þó með öðrum hætti, enda er skjáþreyta farin að hrjá landsmenn og því þótti tilvalið að koma skilaboðum samtakanna á framfæri með áhrifaríkari hætti. Því verður frumsýndur klukkustundarlangur þáttur á aðalfundardeginum, fimmtudaginn 18. mars, kl. 10:00 á öllum miðlum SVÞ auk helstu veffréttamiðla.
Sjá meira um þáttinn hér.