Líkt og á síðasta starfsári hefur uppnám ríkt í starfsemi Úrvinnslusjóðs vegna breytinga sem fylgdu gildistöku laga um opinber fjármál. Stjórn sjóðsins, sem er að meirihluta skipuð fulltrúum atvinnulífsins og þ.á.m. fulltrúa SVÞ, hefur ekki talið meðferð tekna sjóðsins samræmast fyrirkomulagi hans og Evrópuregluverki og því hafa formlegir ársreikningar ekki legið fyrir, m.a. vegna óvissu um tekjur skipt niður á úrvinnsluflokka.
Ráðherra skipaði sjóðnum nýjan stjórnarformann árið 2020 og hefur starf stjórnarinnar verið í góðu horfi. Stjórn endurskoðaði stefnu sjóðsins og hefur að undanförnu tekist á við breytingar sem eru í farvatninu, m.a. vegna innleiðingar Evrópugerða um hringrásarhagkerfið. Tekist hefur verið á um endurvinnslu plasts í fjölmiðlum og hafa stjórn og starfsmenn sjóðsins gaumgæft ferla og kerfi sjóðsins af þeim sökum.
Lögformlega er Úrvinnslusjóður ríkisstofnun sem nýtur framlaga á útgjaldahlið fjárlaga. Í öðrum ríkjum eru slíkir sjóðir jafnan einkareknir. Hér á landi hefur aðkoma hins opinbera að sjóðnum þótt æskileg, m.a. vegna hagræðis við innheimtu tekna sjóðsins sem nýttar eru til að ná settum úrvinnslumarkmiðum. Vegna fyrirkomulags sjóðsins hér á landi hafa hins vegar komið upp álitamál sem vart eru fordæmi fyrir annars staðar og hefur sú spurning t.a.m. vaknað hvort betur færi á að atvinnulífið tæki rekstur sjóðsins alfarið að sér. Hafa ber þó í huga að nokkur ánægja hefur ríkt um starfsemina en starf stjórnar virðist hafa verið í ágætu horfi.