Tilgangur SVÞ er að vera málsvari atvinnurekenda á sviði verslunar og þjónustu, vinna að almennum og sameiginlegum hagsmunamálum aðildarfyrirtækja, stuðla að framförum í verslun og þjónustu, bættum starfsskilyrðum, aukinni arðsemi og samkeppnishæfni og þjónustu við aðildarfyrirtækin á sviði kjaramála í samstarfi við Samtök atvinnulífsins.
Hinn 2. maí 2019 átti stjórnin fundardag með starfsfólki skrifstofu SVÞ þar sem unnin var stefnumótun vegna starfsemi samtakanna.
Niðurstaðan var að beina sjónum að eftirfarandi fimm meginmálefnum:
Smelltu hér til að sjá umfjöllun um stefnu og aðgerðir SVÞ tengdar stafrænu umbreytingunni >>
Smelltu hér til að sjá umfjöllun um stefnu og aðgerðir SVÞ tengdar umhverfismálum og sjálfbærni >>
Kjaramál voru reglulega á dagskrá stjórnar SVÞ á árinu einkum í aðdraganda og við gerð lífskjarasamningsins, en kjarasamningar á almennum vinnumarkaði – lífskjarasamningurinn – sem gildir frá 2019 til 2022 voru undirritaðir 3. apríl 2019.
Að mati Samtaka atvinnulífsins snýst samningurinn um fjórþætta lausn. Hærri laun, einkum fyrir lágtekjuhópa, aukinn sveigjanleika til að stytta vinnuvikuna, lægri skatta og leiðir til að skapa jarðveg fyrir lægri vexti á Íslandi til framtíðar.
Þrátt fyrir að það væri mikill léttir fyrir að kjarasamningar næðust lýstu fjölmargir félagsmenn SVÞ yfir áhyggjum sínum af þeim mikla kostnaðarauka sem samningurinn hefur í för með sér.
Tekjur sveitarfélagana af fasteignaskatti hafa aukist gífurlega á undanförnum árum, langt umfram almenna verðlagsþróun og hafa sveitarfélögin aldrei haft jafn miklar tekjur af þessum skatti og nú. Á sama tíma og árleg hækkun almenns verðlags hefur verið á bilinu 2-3% undanfarin ár hefur skattheimta í formi fasteignaskatts aukist á bilinu 14-18% á ári.
Þessi gífurlega hækkun verður fyrst og fremst rakin til breytinga við aðferð á útreikningi skattsins sem Þjóðskrá tók upp árið 2015.
Stjórn SVÞ lítur á það sem eitt af stærstu viðfangsefnum samtakanna að vinna að lækkun fasteignaskattsins enda er hann gífurlega íþyngjandi fyrir fjölmörg fyrirtæki, ekki síst aðildarfyrirtæki SVÞ.
Þó verulegir áfangasigrar hafi náðst við niðurfellingu almennra vörugjalda og tolla á iðnaðarvörur bera innfluttar landbúnaðarvörur (1.-24. kaflar tollskrár) enn afar háa virka tolla í alþjóðlegum samanburði.
Samhliða afléttingu banns gegn innflutningi ferskra kjötvara frá EES-ríkjunum í árslok 2019 hafa sjónarmið um aukna tollvernd íslenskra landbúnaðarvara fengið ríkt vægi á vettvangi stjórnmálanna.
Smelltu á grafið til að sjá stærri mynd.
Árið 2019 lögðu SVÞ töluverða vinnu í að tryggja hag verslunar- og innflutnings-fyrirtækja þegar að innflutningi kemur.
Útvistun verkefna hefur verið eitt af stóru áherslumálum stjórnar SVÞ mörg undangengin ár. Að mati samtakanna liggja fjöldamörg ónýtt tækifæri á þessu sviði, þar sem mörg þau verkefni sem nú er í höndum opinberra eftirlitsaðila væru betur komin í höndum faggiltra fyrirtækja. Sérstaklega hefur verið bent á að mörg verkefni Vinnueftirlits ríkisins féllu afar vel að starfsemi faggiltra fyrirtækja.
Einföldun regluverks í því skyni að bæta samkeppnishæfni atvinnulífsins er eitt af stóru áherslumálum samtakanna.
SVÞ fagna sérstaklega því frumkvæði sem iðnaðar- og nýsköpunarráðherra og sjávarútvegs- og landbúnarráðherra sýndu s.l. haust, þegar þau ýttu úr vör markvissum aðgerðum til að einfalda það laga- og regluverk sem atvinnulífnu er gert að starfa innan.
Samtökin taka undir þá skoðun ráðherranna að með því megi leysa úr læðingi ýmsa krafta í atvinnulífinu sem ekki hafa fengið að dafna við núverandi aðstæður.
Opinber innkaup og framkvæmd þeirra koma oft á borð samtakanna með einum eða öðrum hætti.
Hin lagalega umgjörð opinberra innkaupa er fremur traust, enda byggist hún á samevrópsku regluverki um málaflokkinn. Engu að síður virðist sem vinnulag við útboð og samningsgerð, bæði ríkisstofnana og sveitarfélaga, mætti vera í betra horfi.
Það er sameiginlegt hagsmunamál hins opinbera sem verkkaupa/kaupanda og fyrirtækjanna sem bjóðenda/seljenda að vandað sé til verka við allt ferli opinberra innkaupa. Það vekur því nokkra undrun að þetta er málaflokkur sem stöðugt kallar á viðbrögð af hálfu samtakanna.