Menntamál hafa verið áberandi á vettvangi stjórnar SVÞ á starfsárinu enda er sá málaflokkur að verða sífellt mikilvægari í öllu starfi hagsmunaaðila fyrir atvinnulífið.
Námsframboð
Námsbraut á fagháskólastigi í verslun og þjónustu hefur fest sig í sessi en námsbrautin er samstarfsverkefni Háskólans í Reykjavík og Háskólans á Bifröst.
Diplómanám í viðskiptafræði og verslunarstjórnun er nám fyrir verslunarstjóra.
Styrkur námsins liggur í virku samstarfi við atvinnulífið.
Námið er diplómanám í viðskiptafræði og verslunarstjórnun er starfstengt fagháskólanám fyrir verslunarstjóra og einstaklinga með víðtæka reynslu af verslunarstörfum. Styrkur námsins liggur bæði í virku samstarfi við atvinnulífið og í samstarfi tveggja háskóla um þróun þess og kennslu.
Námið er metið til eininga í áframhaldandi námi í viðskiptafræði til BS gráðu, bæði við Háskólann á Bifröst og Háskólann í Reykjavík. Nemendur sem útskrifast með diplómagráðu í verslunarstjórnun munu því geta haldið áfram námi til BS gráðu í viðskiptafræði kjósi þeir það.
Námið, sem er 60 ECTS einingar, tekur mið af ofangreindum starfsþáttum. Það er kennt með vinnu og tekur tvö ár í dreifnámi. Námið byggir að hluta á áföngum sem nú þegar eru kenndir til BS gráðu í viðskiptafræðum við Háskólann á Bifröst og Háskólann í Reykjavík. Að hluta er um nýja áfanga að ræða, sérstaklega þróaða með sérþarfir verslunarinnar í huga og með þátttöku lykilfyrirtækja í greininni.
Það eru ca 3-4 að klára á hverri önn og í heildina hafa rúmlega 20 útskriftast.
Núna eru 11 í diploma náminu og 3 í BS náminu en voru rúmlega 20 í fyrra. Það eru miklar sveiflur í innritunum milli ára.
Almenn ánægja er með námið og nemendum finnst það gagnast sér í sínu starfi. Bifröst eru alltaf með rýnihópa á hverri önn með nemendum.
Stafræn viðskiptalína er nýleg námslína á framhaldsskólastigi við Verslunarskóla Íslands sem hóf göngu sína haustið 2019. Unnið var að skipulagi námsins að frumkvæði SVÞ í samstarfi við Verslunarskólann, VR og Starfsmenntasjóð verslunar- og skrifstofufólks. Sérstaða námslínunnar er mikil þar sem í fyrsta skipti er boðið upp á vinnustaðanám sem hluta af námi til stúdentsprófs. Vinnustaðanámið er afmarkað við fyrirtæki sem sérhæfa sig í stafrænum lausnum eins og t.d. vefverslanir. Tækninni fleygir fram og krafan um aukna menntun í verslun og þjónustu fer vaxandi samhliða þeirri stafrænu þróun sem er að verða í atvinnugreininni. Útskrifað hefur verið tvisvar sinnum af brautinni eða alls rúmlega 50 nemendur. Í vor útskrifast þriðji árgangurinn eða 26 nemendur.
Aðsóknin hefur aukist en ákveðið hefur verið að vera með einn bekk í árgangi eins og er sem þýðir að teknir eru inn um 25-27 nemendur á ári.
Samstarfsfyrirtækin eru Sahara, Nova, Aha og Samkaup.
Fagnámi verslunarinnar er nám á framhaldsskólastigi ætlað starfsfólki í verslun sem einnig er hýst í Verslunarskóla Íslands. Námið er 90 einingar og er blanda af fjarnámi og vinnustaðanámi í fyrirtækjunum.
Umsækjendum stendur til boða að fara í raunfærnimat hjá Mími þar sem kunnátta og hæfni hvers og eins er metin til eininga á móti kenndum áföngum. Þannig fá einstaklingar með starfsreynslu og hæfni slíkt metið til eininga og styttingar á námi sínu. Markmið námsins, er meðal annars að nemendur auki þekkingu sína og færni á vinnustað, þjálfist í að veita viðskiptavinum framúrskarandi þjónustu og geti stýrt verkefnum í verslun í samræmi við skipulag og áætlan.
Alls eru 67 nemendur skráðir í nám, af þeim eru 31 nemendur virkir núna á vorönn 2024.
Gert er ráð fyrir að 3 klári fagnámið núna í vor, þess tala gæti þó hækkað eða lækkað. Þau eru öll byrjuð á lokaverkefnunum sem tengjast markaðsfræði, umhverfisfræði og þjónustu og samskiptum.
19 hafa útskrifast úr fagnáminu, það er með fagbréf verslunar og þjónustu (90 einingar)
Frá upphafi hafa innritast í fagnámið 112 nemendur: 67 sem eru virkir, 20 hafa útskrifast og 25 hafa tekið sér hlé en hafa fullan áhuga á að snúa aftur til náms þegar betur stendur á. 5 hafa útskrifast með stúdentspróf (200 einingar).
Áttin er vefgátt, sem greiðir leið fyrirtækja að umsóknum að starfsmenntasjóðum og fræðslusetrum. Áttin er sameiginlegt verkefni atvinnurekenda og launafólks á almennum vinnumarkaði.
Fyrirtæki innan Samtaka atvinnulífsins geta nú sótt um í marga fræðslu- og starfsmenntasjóði með einni umsókn. Umsóknarferlið er einfalt í notkun og býður upp á þann valmöguleika að tengja eina umsókn við marga sjóði fyrir þau fyrirtæki þar sem starfsmannahópurinn er fjölbreyttur og greitt er af í mismunandi stéttarfélög.
Sjóðirnir sem standa að Áttinni eru IÐAN fræðslusetur, Landsmennt, Menntasjóður STF, Rafmennt, Starfsafl, Starfsmenntasjóður verslunar- og skrifstofufólks og
Starfsmenntasjóður verslunarinnar og Sjómennt. Ætla má að sjóðirnir nái til um 110-120 þúsund starfsmanna á almenna vinnumarkaðinum eða um 75-80% starfsmanna á þeim vinnumarkaði.
Aðkoma samtakanna að fræðslu- og menntamálum hefur verið með margs konar hætti, m.a. með þátttöku fulltrúa í ráðum sem hafa með fræðslu- og menntamál að gera og með stuðningi við verkefni á sviði mennta- og fræðslumála. Verkefnin eru fjölbreytt og má þar nefna eftirfarandi:
Stýrihópur um tvær námsbrautir á framhaldsskólastigi sem er unnin í samstarfi við Verslunarskóla Íslands.
Samráðshópur um nám fullorðinna en óskað var eftir tilnefningum frá velferðarráðuneyti, atvinnu- og nýsköpunarráðuneyti, ASÍ, SA, BSRB, Bandalagi Háskólamanna (BHM), Félagi framhaldsskólakennara, Skólameistarafélagi Íslands, Sambandi íslenskra sveitarfélaga, Menntamálastofnun, Innflytjendaráði, Kvasi, ÖBÍ, Fjölmennt, Vinnumálastofnun, Menntavísindasviði Háskóla Íslands, EPALE (Rannís) og Fræðslumiðstöð atvinnulífsins. Samráðshópurinn er skipaður til fjögurra ára.
Verkefnahópur um úrbætur í menntun, hæfingu, atvinnu og tómstundum fyrir nemendur sem lokið hafa námi á starfsbrautum framhaldsskóla. Óskað var eftir tilnefningu frá mennta- og menningarmálaráðuneytinu.
Starfsgreinaráð verslunar- og skrifstofufólks en það sinnir fjölmörgum verkefnum er snúa að menntun og fræðslu fyrir skrifstofu- og verslunargreinar.
Starfsgreinaráð fyrir samgöngu-, farartækja- og flutningagreinar. Þar er unnið víðtækt starf er snýr að menntun og fræðslumálum.
Menntadagur atvinnulífsins er haldinn árlega og ber menntanefndin ábyrgð á honum, heldur utan um skipulag og framkvæmd. Menntadagur atvinnulífsins 2024 var haldinní Hörpu 14. febrúar undir yfirskriftinni - Göngum í takt – er menntakerfið að halda í við þarfir atvinnulífsins? Á fundinum voru uppfærðar niðurstöður úr könnun Gallup á eftirsprun eftir vinnuafli þvert á atvinnugreinar í því augnamiði að skilgreina nauðsynlegar aðgerðir svo vinnualfsskortur hamli ekki vexti í atvinnulífinu.
Ráðherrar málaflokksins mættu í pallborðsumræður þar sem menntakerfið var krufið með tilliti til færniþarfar á vinnumarkaði. Forseti Íslands, Guðni Th.Jóhannesson veitti hin árlegu menntaverðlaun í tveimur flokkum.
Elko fékk Menntaverðlaun atvinnulífsins og Bara tala Menntasprotann.
Menntanefndin sameinast um ýmis verkefni á sviði mennta-, fræðslu- og mannauðsmála og má þar nefna röð morgunverðarfunda undanfarin ár um menntun og mannauð. Ekki hefur verið lögð áhersla á morgunverðafundi þetta árið en stendur það til bóta fyrir næsta ár.
Hæfnirammi um íslenska menntun
Mennta- og menningarmálaráðuneytið skilaði árið 2014 skýrslu til Framkvæmdastjórnar ESB sem lýsti fyrstu drögum að íslenskum hæfniramma og hvernig hann tengdist þeim evrópska. Frá 2014 hafa hagsmunaaðilar unnið að þróun rammans og þann 12. október 2016 var samþykkt ný útfærsla í kjölfar náins samstarfs við alla hagsmunaðila í menntun á Íslandi og atvinnulífið með sameiginlegri yfirlýsingu.
Undir yfirlýsinguna skrifuðu mennta- og menningarmálaráðuneytisins, Samtök atvinnulífsins, Alþýðusamband Íslands, Bandalag háskólamanna, Kvasir, Leikn, Landsamtök íslenskra stúdenta og Samband íslenskra framhaldskólanema. Þar er stutt lýsing á hverju þrepi. Einnig hefur starfshópur unnið að ítarlegri útfærslu á hæfniviðmiðum fyrir þrep 1 til 4. Sambærileg vinna við þrep 5 til 7 mun fara fram. Að því loknu verður skrifuð ný skýrsla um allan rammann, bæði á íslensku og ensku.
Hæfniramma um íslenska menntun er ætlað að endurspegla stigvaxandi hæfnikröfur í formlegu og óformlegu námi á Íslandi. Kortlagning starfsgreinaráðs á störfum innan verslunar nýtist vel fyrir greinina og tengir inn í hæfniþrep íslenska hæfnirammans.
