Stafrænt og leiðin úr kófinu

COVID-19

Heimsfaraldur COVID hefur sýnt svo um munar fram á gagnsemi og nauðsyn stafrænnar þróunar, m.a. til að renna fleiri stoðum undir verðmætasköpun og skapa atvinnutækifæri.
Vegna kórónufaraldursins glatast fjölmörg störf. Þetta eykur enn frekar þörfina á því að skapa störf og tryggja að fólk á vinnumarkaði hafi þá færni sem þörf er á í sífellt meira stafrænt væddum störfum.Faraldurinn hefur ekki síður gjörbreytt afstöðu stjórnenda fyrirtækja og einstaklinga til stafrænnar tækni og skapað nýja sýn á þá möguleika sem búa í stafrænni tækni nú þegar mun fleiri en áður hafa nýtt hana til fjarvinnu og fólki hefur verið ýtt út í að tileinka sér nýja stafræna færni til að halda hjólum atvinnulífsins gangandi (Aðgerðaáætlun um fjórðu iðnbyltinguna). Bilið milli þeirra sem kunna og kunna ekki þegar kemur að stafrænni hæfni fer sífellt stækkandi vegna heimsfaraldursins, hvort sem um er að ræða þjóðir, fyrirtæki eða einstaklinga (OECD, UNCTAD). Markvissar aðgerðir til aukningar stafrænnar hæfni, á borð við Stafrænt hæfnisetur, eru því lykilatriði til að tryggja samkeppnishæfni bæði íslensks efnahags, fyrirtækja og fólks á vinnumarkaði.

Sýnt hefur verið fram á að stafræn fyrirtæki (e. digital natives) og fyrirtæki sem hófu stafræna vegferð sína snemma standa betur í núverandi krísu heims-faraldurs og aðlaga sig hraðar að nýjum þörfum samfélags og manna.

- WEF

Lítil og meðalstór fyrirtæki standa verr að vígi í stafrænni þróun en stærri fyrirtæki og til að þau nái að njóta ávinnings hennar þurfa þau aðstoð við að komast yfir hindranir sem standa í vegi fyrir áhrifaríkri notkun stafrænnar tækni (OECD).Yfirstandandi heimsfaraldur hefur einnig hraðað stafrænni þróun gríðarlega. Ekki sér fyrir endann á þeim breytingum sem faraldurinn mun hafa á atvinnulíf og samfélög.

Haft er eftir Sataya Nadella, forstjóra Microsoft, að COVID-19 hafi aukið hraða stafrænnar þróunar svo mikið að það sem áður hefði tekið 2 ár gerðist nú á 2 mánuðum.

Jafnframt veltur það hvernig okkur tekst til að endurvekja hagkerfi heimsins og skapa störf að miklu leyti á samstilltu átaki til að hraða stafrænni þróun.
Við erum sífellt háðari stafrænni þjónustu og þróunin mun ekki ganga til baka. (WEF)

Áhrif heimsfaraldurs Covid-19 á efnahagslíf Íslands eru mikil og munu neikvæðar afleiðingar fylgja okkur inn í nánustu framtíð.

Þetta áfall hefur svo um munar minnt á mikilvægi þess að fleiri stoðum sé rennt undir verðmætasköpun landsins.

Stærsta tækifærið til þess er að nýta tækni fjórðu iðnbyltingarinnar til að búa til ný atvinnutækifæri, auka verðmætasköpun og efla opinbera þjónustu.